Mishel dhe Stefani Karafili, prindërit e të ndjerit Antonio Karafili, i janë drejtuar Prokurorisë së Korçës me një kërkesë zyrtare për ndryshimin e akuzës ndaj Kejsi Spaillarit, e shpallur në kërkim ndërkombëtar për vrasjen e djalit të tyre në qershor 2018 në Voskopojë.

Aktualisht, 25-vjeçarja Spaillari është nën akuzë për “vrasje me dashje” në bashkëpunim me Rexhep Vathin, ndërsa prindërit kërkojnë që ajo të akuzohet për “vrasje për shkak të marrëdhënies familjare”, duke u mbështetur në faktin se ajo dhe Antonio kishin bashkëjetuar për më shumë se dy vite si çift, marrëdhënie që ishte pranuar edhe nga familjet përkatëse.

Në një MEMO të dorëzuar në Prokurori, familja Karafili thekson:

“Kejsi Spaillari dhe Antonio Karafili kanë pasur një lidhje intime dhe të vazhdueshme për më shumë se dy vite… Marrëdhënia e tyre ka qenë e pranuar nga të dy familjet, duke i dhënë kësaj lidhjeje karakterin e një familjeje de facto.”

Nëse kërkesa e familjes pranohet dhe akuzat ndryshojnë, Spaillari – që sipas burimeve ndodhet me banim në Kanada – rrezikon një dënim që varion nga 25 deri në 35 vite burg.

Ngjarja tronditëse ndodhi në qershor 2018, ku 18-vjeçari Antonio Karafili u gjet i mbytur me çarçaf dhe më pas i varur në një pemë, në atë që fillimisht u dyshua si vetëvrasje, por më vonë u zbardh si një vrasje makabre.