Kryetari i Partisë Demokratike, Sali Berisha, zhvilloi pasditen e së hënës një miting madhështor në qytetin e Beratit, ku iu drejtua qytetarëve me një thirrje të fortë për vendimin historik që i pret më 11 maj.

Në një fjalim të mbushur me emocione, Berisha theksoi se “fitorja e 11 Majit është fitorja juaj, fitorja e çdo qytetari shqiptar, fitorja e Shqipërisë dhe kombit shqiptar.”

“Të dashur qytetare dhe qytetarë të Beratit, Kuçovës, Skraparit, Dimalit, të të gjithë këtij qarku, në këtë shesh, kudo që jeni në Berat, në Shqipëri dhe në diasporë. Përshëndetjet e mia më të përzemërta, mirënjohjen më të pakufishme për mbështetjen tuaj, për energjinë, entuziazmin, optimizmin që ju i dhatë kësaj fushate. Për shpresën që mbollët çdo minutë, çdo orë dhe çdo ditë anembanë Beratit,” – tha Berisha.

Ai falënderoi aleatët e tij politikë, ndër ta kryetarin e PR-së Fatmir Mediu dhe përfaqësuesin ndërkombëtar Filip Grifin, duke theksuar lidhjet me kampin republikan në SHBA dhe përvojën e strategëve të fushatës së Presidentit Donald Trump.

Berisha i bëri thirrje qytetarëve që të marrin pjesë masivisht në votim, duke e cilësuar këtë si një betejë për të ardhmen:

“Me 11 maj qytetarët e Beratit dhe mbarë Shqipërisë ftohen në një vendim historik, për t’u ndarë me një të keqe të madhe.”