Në një nga paraqitjet më të paharrueshme të Met Gala 2025, aktorja dhe këngëtarja Janelle Monáe shkëlqeu në tapetin e kuq me një veshje sureale dhe të sofistikuar të Thom Browne, të realizuar me stilistin Paul Tazewell. Pelerina trompe l’oeil me shpatulla të ekzagjeruara, e veshur mbi një kostum të zi, të kuq dhe të bardhë me vija të holla, solli në jetë një siluetë dramatike e futuriste.

Por pjesa më e guximshme e pamjes ishte një brosh diamanti 5.5 karatësh i bërë nga… tekila!. Krijuar nga stilisti i bizhuterive Jonathan Raksha për markën Tequila 1800 Cristalino, ky gur unik është një prerje smeraldi nga vetë lëngu i tekilës, i vendosur mbi një bazë prej safiri të bardhë 70 karatësh dhe rrethuar nga diamante të përmbysur, që simbolizojnë thumbat e bimës së agaves.

Një kombinim i guximit artistik, luksit ekstravagant dhe inovacionit teknik — pamja e Monáe ishte një deklaratë që e tejkalon modën dhe hyn në territorin e artit.