Në një fjalim të fuqishëm nga sheshi i Beratit, Philip Griffin, këshilltari i ngushtë i strategut elektoral të Donald Trump, Chris LaCivita, u bëri thirrje qytetarëve shqiptarë që të marrin në dorë fatin e vendit duke dalë masivisht në votime më 11 maj.

“Ju sjell përshëndetjet e mia nga Shtetet e Bashkuara të Amerikës. Amerika është shumë e interesuar për atë që po ndodh këtu në Shqipëri,” – tha Griffin. Ai e krahasoi situatën në Shqipëri me luftën politike në SHBA, ku sipas tij, përpjekjet e socialistëve për të ndalur Donald Trump dështuan falë vendosmërisë së popullit.

Griffin theksoi se Dr. Sali Berisha është në një mision për të kthyer Shqipërinë tek qytetarët dhe për të ndalur emigrimin masiv të të rinjve. “Dr. Berisha nuk mund ta bëjë këtë vetëm. Tani është koha që ju të bëni pjesën tuaj,” – u shpreh ai.

“Dilni të votoni me familjen, me fqinjët, me miqtë. Vetëm kështu vjen fitorja, fitorja, fitorja!” – përfundoi Griffin, duke ngjallur entuziazëm dhe thirrje nga të pranishmit.