Kryeministri dhe kryetari i Partisë Socialiste, Edi Rama, gjatë një takimi elektoral në qytetin e Vlorës, theksoi rëndësinë e pjesëmarrjes masive në zgjedhjet parlamentare të 11 majit dhe shprehu bindjen se qarku i Vlorës mund të japë 9 mandate për Partinë Socialiste.

Rama tregoi një episod me një mik nga Tirana, i cili ishte skeptik mbi mundësinë që Vlora të prodhojë 9 mandate për PS. “Një shoku im nga Tirana kishte parë memorandumin e Kucit dhe më shkroi: Si ka mundësi që mandatin e 9 e ke vënë me 50%? Vlora nuk i jep 9 mandate PS-së,” tregoi Rama. “I thashë: ti nuk i njeh vlonjatët. Mendon se është kaq e thjeshtë?”

Sipas tij, çështja nuk është thjesht numri i mandateve, por mobilizimi i qytetarëve. “Problemi nuk janë 10 mandatet, por si ta nxjerrësh Vlorën nga shtëpia,” u shpreh Rama, duke theksuar se çdo qytetar duhet të dalë të votojë jo për të mirën e tij personale, por për transformimin që, sipas tij, i është bërë qytetit.

Ai nënvizoi se Vlora nuk duhet të mbetet prapa, ndërsa Partia Socialiste synon 88 mandate në rang kombëtar. “Për të gjithë atë xhelozi që është krijuar për shkakun tim, nuk ka kuptim që PS të ngjitet te 88 mandatet dhe Vlora të mbetet tek 8. Vlora e di vetë,” përfundoi Rama.