Kryetari i Partisë Demokratike, Sali Berisha, ka zhvilluar një takim përmbyllës të fushatës elektorale në Shkodër, ku ka hedhur akuza të ashpra ndaj kryeministrit Edi Rama dhe ka premtuar një seri masash ekonomike në rast të fitores së PD-së më 11 maj.

Në fjalën e tij, Berisha theksoi se një nga prioritetet e tij do të jetë kthimi i parave të qytetarëve, duke i akuzuar ata që janë në pushtet për abuzime me financat publike. “Paratë i marrin nga rrogat tuaja, i vënë në rrugë të gjitha për t’u vjedhur. Ndërtojnë saraje dy herë më të mëdha se Enver Hoxha, kopshte katër herë më të mëdha, dhe dalin dhe fletin për ‘çyrykë’, duke fyen qytetarët. Ja them këtu sot, atë e bën vetëm Maduro, diktatori i Venezuelës, e ka në fjalor atë term,” tha Berisha.

Ai kërkoi që më 11 maj, qytetarët të ndëshkojnë me votë qeverinë aktuale për abuzimet dhe dështimet në administrimin e financave. “Ky meriton ndëshkimin më të madh,” tha ai, duke shtuar se do të kthejnë paratë dhe do të nisin një sërë masash për përmirësimin e kushteve ekonomike të qytetarëve.

Berisha premtoi se nëse do të vijohej qeverisja nga Partia Demokratike, do të vendoset një “minimum jetik” prej 200 eurosh, paga minimale 500 euro dhe një kartë konsumatori për pensionistët. Po ashtu, ai theksoi se për çdo biznes të vogël do të ofrohet energji me çmim të ulët, si dhe do të ketë një ulje drastike të tarifave për shërbime të ndryshme publike, duke përfshirë gjysmimin e tarifës së ujit dhe uljen e kostos për hapësirat publike.

Deklaratat e Berishës vijnë në një moment kur tensionet politike janë të larta dhe qytetarët janë të ftuar të vendosin për të ardhmen e vendit në zgjedhjet e 11 majit.