Një ngjarje e pazakontë dhe shqetësuese ka tronditur qytetin e Korçës, pasi një video me përmbajtje të papërshtatshme ka qarkulluar nëpër telefonat e qytetarëve, duke detyruar policinë të ndërhyjë me procedim penal ndaj tre personave të përfshirë.

Sipas burimeve zyrtare nga Komisariati i Policisë së Korçës, ngjarja është regjistruar në zonën e Pazarit të Vjetër, ku një vajzë e mitur 16-vjeçare, me inicialet O.D., ka filmuar dy shtetas të moshuar, të cilët shfaqen në video duke kryer veprime të turpshme në publik.

Pas hetimeve të shpejta, policia arriti të identifikojë të miturën, e cila pranoi autorësinë e videos dhe për pasojë u procedua penalisht për veprën penale të “pornografisë”. Ndërkohë, edhe dy shtetasit që shfaqen në video, një femër me inicialet I.R. dhe një mashkull i moshuar me inicialet M.G., u proceduan për veprën penale të “veprimeve të turpshme në publik”.

Videoja, e cila është shpërndarë gjerësisht në rrjetet sociale dhe telefonat e qytetarëve, ka shkaktuar reagime të forta në opinionin publik, veçanërisht për shkak të përfshirjes së një të miture dhe ekspozimit të të moshuarve në situata të pahijshme.

Policia e Korçës ka bërë thirrje për kujdes të shtuar nga qytetarët në shpërndarjen e materialeve të tilla, si dhe ka paralajmëruar masa të rrepta ligjore për çdo rast të ngjashëm që shkel privatësinë apo moralin publik.

Hetimet për rastin vijojnë, ndërsa autoritetet janë të vendosura të godasin çdo formë të devijimit etik dhe ligjor, pavarësisht moshës apo statusit social të individëve të përfshirë.