SPAK ka identifikuar një nga ngarkesat më të mëdha të kokainës të kapura ndonjëherë në Itali si pronë e klanit të njohur kriminal shqiptar, të drejtuar nga Elvis Doçi, i njohur si “Visi i Pojës” në Durrës. Bëhet fjalë për 932 kilogramë kokainë të ardhura nga Kili përmes një konteineri me midhje të ngrira, të sekuestruara më 2 nëntor 2020 në portin italian “Gioia Tauro”.

Zbulimi është bërë i mundur nga analiza e bisedave në aplikacionin e enkriptuar “Sky ECC”, ku një ndër protagonistët kryesorë, punonjësi i policisë Orgest Molla, komunikon në mënyrë të koduar me Sueld Elezin për “kapjen e 932 bukëve” – një term i përdorur për kokainën. Biseda e zhvilluar më 10 nëntor 2020 zbulon detaje për trafikun dhe destinacionin e drogës, ndërsa referencat e vazhdueshme për “mallin” dhe kërkesat tregojnë për një rrjet të mirëorganizuar shpërndarjeje.

SPAK në bashkëpunim me autoritetet italiane i është referuar kësaj bisede si provë themelore për të kërkuar dokumentacionin hetimor nga Italia, përmes një letërporosie të dërguar më 5 nëntor 2024. Kjo është prova më e qartë deri më tani që lidh grupin e strukturuar kriminal të Troplinëve me një trafik ndërkombëtar droge në përmasa industriale, i cili kap vlerën e rreth 186 milionë eurove nëse droga do dilte në treg.

Hetimet janë ende në zhvillim dhe SPAK dyshon se përveç Orgest Mollës dhe Sueld Elezit, janë përfshirë edhe persona të tjerë të paidentifikuar deri në këtë fazë të hetimit.