Një tjetër aksident tragjik në vendin e punës ka marrë jetën e një shtetasi shqiptar në Itali. Viktima, një 38-vjeçar banues prej kohësh në Castel Bolognese, po punonte në një arë të një ferme bujqësore që ndodhet mes Solarolo-s dhe Castel Bolognese-s, kur humbi jetën në rrethana ende për t’u sqaruar.

Ngjarja e rëndë ndodhi pasditen e së premtes, rreth orës 18:00. Familjarët, të shqetësuar për mungesën e komunikimit me të, shkuan në vendin e punës për ta kërkuar dhe fatkeqësisht e gjetën të pajetë.

Sipas informacioneve paraprake, aksidenti dyshohet të ketë ndodhur si pasojë e shtypjes nga një traktor. Më konkretisht, ekziston hipoteza se 38-vjeçari është shtypur nga pirunët e mjeteve ngritëse të traktorit gjatë punës në fermë.

Në vendngjarje mbërriti shërbimi i ndihmës së shpejtë 118, por pavarësisht përpjekjeve të stafit mjekësor, viktima nuk mund të shpëtohej dhe vdekja u konstatua në vend.

Policia dhe autoritetet lokale kanë nisur hetimet për të sqaruar plotësisht dinamikën e aksidentit dhe për të përcaktuar shkaqet që çuan në këtë tragjedi.

Ngjarja ngjalli dhimbje tek familjarët dhe komuniteti lokal, duke rikujtuar edhe një herë rëndësinë e masave të sigurisë në vendet e punës, sidomos në sektorin bujqësor, ku aksidentet janë ende të shpeshta.