Guatemala ndodhet sërish përballë një rreziku natyror serioz, pasi një shpërthim i fuqishëm dhe i vazhdueshëm i vullkanit Fuego ka detyruar autoritetet të evakuojnë mbi 700 persona nga zonat përreth për arsye sigurie.

Vullkani, i pozicionuar rreth 18 kilometra në jugperëndim të qytetit turistik Antigua, ka nxjerrë re hiri që janë ngjitur deri në 4.8 kilometra lartësi, ndërsa rrjedhat e lavës janë grumbulluar në afërsi të kraterit, duke krijuar një situatë të rrezikshme për komunitetin lokal. Të dhënat janë konfirmuar nga agjencia sizmologjike e Guatemalës, e cila po monitoron nga afër zhvillimet.

Evakuimet janë kryer kryesisht në komunitetet që ndodhen në rrethinat jugore dhe perëndimore të vullkanit, ku rreziku nga llava dhe hiri është më i lartë. Shërbimet e emergjencës janë vendosur në gatishmëri të plotë dhe autoritetet kanë ngritur qendra pritjeje për të strehuar të prekurit nga kjo ngjarje natyrore.

“Jemi në kontakt të vazhdueshëm me autoritetet lokale dhe specialistët e fushës për të siguruar mbrojtjen e qytetarëve tanë”, deklaroi një zëdhënës i Agjencisë Kombëtare të Menaxhimit të Fatkeqësive të Guatemalës (CONRED).

Megjithëse deri më tani nuk raportohet për viktima apo të lënduar, autoritetet kanë paralajmëruar se aktiviteti i vullkanit mbetet i lartë dhe nuk përjashtohet mundësia e shpërthimeve të tjera. Evakuime të mëtejshme mbeten të mundshme nëse situata përkeqësohet.

Vullkani Fuego është një nga më aktivët në Amerikën Qendrore dhe shpërthimet e tij janë të shpeshta. Kujtojmë se në vitin 2018, një shpërthim i ngjashëm në këtë vullkan shkaktoi qindra viktima dhe dëme të konsiderueshme materiale.

Autoritetet i kanë bërë thirrje popullatës të ndjekë me kujdes udhëzimet zyrtare dhe të shmangin zonat e rrezikut deri në stabilizimin e situatës.