Një debat për një vend parkimi mbrëmjen e djeshme në Ksamil u përshkallëzua në një konflikt fizik, ku një 54-vjeçar shqiptar mbeti i lënduar, ndërsa një turist turk përfundoi në pranga.

Policia e Sarandës arrestoi 26-vjeçarin Hasan Dembiras, shtetas turk me banim në Kosovë, i cili dyshohet se goditi Adriatik Mollanjin gjatë sherrit. Ngjarja ndodhi gjatë një debati verbal për parkimin, ku një grup turistësh turq u përfshinë në përplasje me Mollanjin.

Gjatë konfliktit, 54-vjeçari u shty dhe ra në tokë, duke pësuar dëmtime në pjesën e pasme të kokës. Ai u dërgua menjëherë në Spitalin Rajonal të Sarandës, ku mori trajtimin e nevojshëm dhe aktualisht ndodhet jashtë rrezikut për jetën.

Pas hetimeve, policia arrestoi Dembirasin si autorin e dyshuar të aktit të dhunës. Materialet i janë përcjellë Prokurorisë së Sarandës, ndërsa hetimet për ngjarjen vazhdojnë.