Austria është tronditur thellë nga një prej ngjarjeve më të dhunshme në historinë e saj moderne, pasi një 21-vjeçar i armatosur vrau 10 persona në ish-gimnazin ku kishte studiuar, përpara se t’i jepte fund jetës së tij në një nga banjot e shkollës. Ngjarja ndodhi të martën në qytetin e Gracit, qyteti i dytë më i madh në Austri.

Mes viktimave është konfirmuar edhe një vajzë me prejardhje nga Kosova, çka ka shtuar dhembjen në komunitetin shqiptar në Austri dhe më gjerë.

Policia austriake konfirmoi se sulmuesi veproi i vetëm dhe ishte i armatosur me një pushkë dhe një revole. Autoritetet po hetojnë në mënyrë të thelluar aktivitetin online dhe të kaluarën e tij psikologjike, ndërsa kanë bastisur shtëpinë e tij për të zbuluar motivin e kësaj tragjedie.

“Është shumë e vështirë ta kuptosh këtë ngjarje”, tha Paul Nitsche, mësues i lëndës së studimeve fetare në shkollë, i cili ndodhej brenda institucionit në momentin e sulmit. Ai tregoi se kishte dalë nga klasa pak çaste para se sulmuesi të përpiqej të hynte, duke parë nga afër përpjekjen e tij për të qëlluar bravën e një dere tjetër.

Autoritetet austriake janë angazhuar maksimalisht për të kuptuar shkaqet që çuan në këtë akt makabër, ndërsa opinioni publik është në zi dhe komuniteti i Gracit është përfshirë nga tronditja dhe pasiguria.

Ngjarja rikthen në vëmendje sfidat e sigurisë në ambientet shkollore dhe gjendjen mendore të të rinjve, duke ngjallur diskutime të reja për reformat e nevojshme në sistemin arsimor dhe shëndetin mendor në Austri.