Një studim i ri i botuar në revistën prestigjioze Nature Metabolism hedh dritë mbi një lidhje të pazakontë mes temperaturave ndaj të cilave jemi ekspozuar gjatë lindjes dhe mënyrës se si trupat tanë ruajnë yndyrën përgjatë jetës. Studiuesit tregojnë se temperatura mjedisore në periudhën e ngjizjes dhe lindjes mund të jetë një faktor kyç që ndikon në zhvillimin e llojeve të ndryshme të yndyrës në organizëm.

“Indi dhjamor kafe, i cili është veçanërisht aktiv tek të porsalindurit, ndihmon në gjenerimin e nxehtësisë dhe është thelbësor për mbajtjen e trupit ngrohtë në klimat më të ftohta,” shpjegojnë autorët e studimit. Ndërkohë, indi dhjamor i bardhë, i cili vepron si rezervë energjie afatgjatë, grumbullohet më shumë në kushte më të ngrohta dhe shërben gjithashtu si një organ sekretues hormone.

Studiuesit analizuan aktivitetin e indit dhjamor kafe, dendësinë e tij dhe gjenerimin e nxehtësisë te 683 burra dhe gra të moshave të ndryshme, të cilët kishin prindër të ekspozuar ndaj temperaturave të ndryshme gjatë ngjizjes dhe lindjes së tyre. Rezultatet treguan se individët të cilët janë ngjizur gjatë stinëve të ftohta shfaqin “aktivitet më të lartë të indit dhjamor kafe, shpenzim më të lartë të energjisë së trupit dhe BMI më të ulët si të rritur”.

“Këtu raportojmë se individët, nënat e të cilëve kanë ngjizur gjatë stinëve të ftohta, shfaqin aktivitet më të lartë të indit dhjamor kafe, termogjenezë adaptive, rritje të shpenzimeve totale ditore të energjisë dhe indeks më të ulët të masës trupore dhe akumulim më të ulët të yndyrës viscerale,” nënvizojnë autorët.

Sipas studimit, “temperaturat më të ulëta të jashtme dhe luhatjet më të mëdha të temperaturave ditore gjatë periudhës së fekondimit janë përcaktues kryesorë të aktivitetit të indit dhjamor kafe.”

Ky zbulim hap perspektiva të reja në kuptimin e ndikimit të mjedisit të hershëm në mënyrën se si trupi ynë menaxhon energjinë dhe yndyrën, dhe mund të ketë implikime të rëndësishme për trajtimin e problemeve të metabolizmit dhe obezitetit në të ardhmen.

Studiuesit kanë shprehur dëshirën për të vazhduar eksplorimin e mëtejshëm të kësaj lidhjeje në studime të ardhshme, duke theksuar rëndësinë e kuptimit të faktorëve mjedisorë në zhvillimin e shëndetit metabolik.