Fshati Xibërr në Klos u trondit mbrëmjen e djeshme nga një ngjarje e rëndë kriminale: 65-vjeçari Selim Velsula u masakrua me mjet prerës nga kushëriri i tij, Hazbi Velsula. Viktima u gjet i pajetë me plagë të shumta me thikë në gjoks.
Ngjarja ndodhi pranë banesës së viktimës, ndërsa thika me të cilën dyshohet se u krye krimi u gjet në vendngjarje.
⸻
Kushëriri: “Nuk kishin konflikte. Mendoj se ka qenë në gjendje të rënduar psikologjike”
Për News24, ka folur kushëriri i parë i viktimës, Rasim Velsula, i cili hedh dyshime mbi gjendjen mendore të autorit:
“Kemi hyrje-dalje me të dyja familjet. Unë them që autori ka qenë në depresion, nuk e shpjegoj dot ndryshe. Është i ri, i pamartuar. Nuk kishin konflikte me njëri-tjetrin.”
Sipas tij, Hazbi Velsula jetonte në Tiranë me familjen dhe kthehej vetëm për të punuar tokat në Xibërr.
“Ne e dinim sikur ishin jashtë shtetit, në Greqi, por ja që ndodhi kjo që ndodhi”, shtoi ai.
⸻
Autori i dyshuar, arrestuar në Tiranë – Motivet mbeten mister
Policia ka mundur të lokalizojë dhe të arrestojë Hazbi Velsulën në zonën e Alliasit në Tiranë, pak orë pas krimit. Deri më tani nuk janë bërë publike motivet e krimit, ndërsa hetimet po vijojnë për të sqaruar rrethanat dhe gjendjen psikologjike të autorit në momentin e ngjarjes.
Ngjarja ka tronditur komunitetin lokal, për shkak të lidhjeve familjare midis viktimës dhe autorit, si dhe mungesës së çdo konflikti të njohur mes tyre.
