Nga 1 gushti 2025, sistemi shëndetësor publik dhe privat në Shqipëri do të aplikojë një format të ri të recetës mjekësore. Ndryshimi kryesor lidhet me detyrimin që çdo recetë të përmbajë diagnozën e pacientit dhe përshkrimin e barnave vetëm me emrin gjenerik, jo atë tregtar.

Ministrja e Shëndetësisë dhe Mbrojtjes Sociale, Albana Koçiu, gjatë një vizite në dy farmaci në Tiranë, deklaroi se ky model synon të rrisë sigurinë e pacientëve dhe të lehtësojë punën e farmacistëve.

“Receta e re do të përmbajë diagnozën dhe emrin gjenerik të barit. Kjo është një garanci më shumë që pacientët të marrin trajtimin e saktë nga profesionistët e shëndetit,” u shpreh Koçiu.

Një tjetër lehtësim i rëndësishëm është mundësia që pacientët kronikë të marrin recetë për trajtim deri në gjashtë muaj, duke shmangur radhët e shpeshta në klinika e spitale.

Përveç këtyre, receta e re do të ketë edhe të dhëna teknike shtesë: dallimin e tipit të recetës për sëmundje akute apo kronike, si dhe vendosjen e emrit dhe vulës së farmacistit.

Ministrja theksoi se ky ndryshim pritet të përmirësojë ndjekjen e trajtimeve mjekësore dhe të rrisë kontrollin mbi përdorimin e barnave.