Gjatë 24 orëve të fundit në vend janë raportuar 30 vatra zjarri, nga të cilat 8 vijojnë të jenë aktive, ndërsa strukturat operacionale po punojnë për izolimin dhe shuarjen e tyre.

Ministria e Mbrojtjes bëri me dije se në operacionet për përballimin e situatës janë angazhuar 54 automjete zjarrfikëse dhe 502 forca operacionale. Në mbështetje të tyre janë vendosur edhe 110 efektivë të Forcave të Armatosura, 3 helikopterë dhe avioni “Air Tractor” i Forcës Ajrore.

Në zonën e Dajtit vijon puna për shuarjen e zjarrit, ndërsa autoritetet bëjnë me dije se aktualisht nuk ka rrezik për zonat e banuara. Operacionet vazhdojnë edhe në Priskë dhe Çakallesh, ku situata po mbahet nën kontroll.

Në bashkinë Mallakastër, në zonat Riban, Ngraçan dhe Panahor, forcat zjarrfikëse vijojnë ndërhyrjen për shuarjen e zjarrit në terren të vështirë. Sipas raportimeve zyrtare, edhe në këto zona nuk paraqitet rrezik për banesat.

Në qarkun e Elbasanit vijon puna në vatrat e zjarrit në Shqiponjë, malin e Dardhës dhe Mjekës. Zjarri në Shqiponjë është vënë nën kontroll, ndërsa vatra në malin e Dardhës është izoluar.

Ndërkohë, në Kostren 2, në bashkinë Berat, po vijon ndërhyrja për shuarjen e një vatre të riaktivizuar, ku janë angazhuar forca dhe mjete zjarrfikëse.

Autoritetet vijojnë monitorimin e situatës në të gjitha zonat problematike, ndërsa operacionet do të vazhdojnë deri në neutralizimin e plotë të vatrave aktive.