Një ngjarje e rëndë ka ndodhur mëngjesin e sotëm në aeroportin Malpensa të Milanos, ku një 26-vjeçar ka vënë zjarrin një koshi plehrash pranë zonës së regjistrimit në Terminalin 1, pranë Portës 13, duke shkaktuar panik mes udhëtarëve.
Sipas mediave italiane, flakët u përhapën shpejt, ndërsa tymi i zi mbushi zonën. Pasagjerët u larguan me shpejtësi, dhe momentet e kaosit u filmuan nga dëshmitarë, duke qarkulluar gjerësisht në rrjetet sociale.
Zjarrvënësi, një shtetas nga Mali me dokumente të rregullta dhe pa precedentë penalë, u neutralizua menjëherë nga policia dhe stafi i sigurisë. Pamjet tregojnë burrin, dukshëm të shqetësuar, duke u ndaluar në vendngjarje.
Përpara incidentit, i riu kishte përdorur një çekiç për të shkatërruar një sportel regjistrimi. Zjarrfikësit evakuuan zonën për siguri, ndërsa operacionet në aeroport rifilluan normalisht pas disa minutash.
