Një aksident është regjistruar mëngjesin e kësaj të mërkure në lagjen nr. 2 të Sarandës, pranë hotelit “Abedini”.

E aksidentuara është Anastasja Sirotkina, 40 vjeçe, shtetase e huaj, por banuese në Sarandë prej dy vitesh. Ajo po drejtonte një motomjet tip “Piaggio” me targë BD025, kur humbi kontrollin, doli nga rruga dhe u rrëzua në hapësirën ndarëse mes trotuarit dhe një pallati aty pranë.

Sipas banorëve, në atë zonë mungon një barrierë mbrojtëse, gjë që e bëri të pamundur shmangien e rënies. Banorët e pallatit njoftuan menjëherë spitalin dhe policinë.

E plagosura u transportua me urgjencë në spitalin e Sarandës, ku mjekët konfirmuan se përveç tronditjes, 40-vjeçarja ka thyer këmbën.

Shërbimet e qarkullimit po hetojnë shkaqet e aksidentit, ndërsa mësohet se gjendja shëndetësore e Anastasja Sirotkinës është jashtë rrezikut për jetën.