Një gjykatë apeli në Nju Jork ka rrëzuar gjobën prej 500 milionë dollarësh që Presidenti Donald Trump ishte urdhëruar të paguante vitin e kaluar për mashtrim civil lidhur me rritjen e artificiale të vlerës së pasurive të Organizatës Trump, me qëllim sigurimin e kushteve më të favorshme për kredi.

Gjyqtarët e Divizionit të Apelit të Gjykatës Supreme të Nju Jorkut thanë se, megjithëse Trump ishte përgjegjës për mashtrim, gjoba prej gjysmë miliard dollarësh ishte e tepruar dhe shkelte mbrojtjet kushtetuese kundër dënimeve të ashpra.

Vendimi fillestar i gjykatës së shkallës së parë, i udhëhequr nga gjykatësi Arthur Engoron, kishte vendosur fillimisht një gjobë prej 355 milionë dollarësh, e cila u rrit në mbi 500 milionë pas akumulimit të interesave. Gjykatësi kishte vendosur gjithashtu që Trump të mos shërbente si drejtues kompanie apo të merrte kredi nga bankat në shtetin e Nju Jorkut për tre vjet.

Paneli prej pesë gjyqtarësh të Apelit ishte i ndarë mbi meritat e padisë fillestare të ngritur nga Prokurorja e Përgjithshme e Nju Jorkut, Letitia James, e cila akuzoi Trump dhe djemtë e tij për “mashtrim të vazhdueshëm dhe të përsëritur”.