Guardamar del Segura, Spanjë – Autoritetet lokale kanë mbyllur të gjitha plazhet në qytetin bregdetar të Guardamar del Segura, në juglindje të Spanjës, pas zbulimit të kërmijve detarë helmues të njohur si “dragoi blu” (Glaucus atlanticus).

Policia lokale njoftoi se, për arsye sigurie, hyrja në plazhet komunale është ndaluar deri në një urdhër të ri. Kjo krijesë e vogël, vetëm 3 centimetra e gjatë, është e njohur për aftësinë e saj të jashtëzakonshme për të përqendruar helmin e prenë së saj, duke qenë në gjendje të paralizojë organizma deri në 300 herë më të mëdhenj.

“Kontakti me këtë kafshë detare mund të jetë i rrezikshëm dhe të shkaktojë djegie të dhimbshme në lëkurë,” paralajmëroi policia, duke u bërë thirrje plazhistëve të tregojnë kujdes të madh dhe të shmangin çdo kontakt me këto krijesa, edhe nëse gjenden në rërë.

Ndërkohë, ekipet e shpëtimit po monitorojnë vijën bregdetare për të identifikuar dhe larguar çdo ekzemplar të rrezikshëm, ndërsa autoritetet pritet të japin një njoftim të ri mbi rihapjen e plazheve.