Ndryshon trupa gjykuese e apelit të cilët ishin në ngarkim të dosjes së ish-kryeprokurorit të përgjithshëm Adriatik Llalla.

Gjyqtarët Dhimitër Lara dhe Saida Dollani kanë dhënë dorëheqjen.

Ata kanë qenë pjesë e trupës gjykuese që kanë vendosur sekuestron e pasurive të ish-kryeprokurorit.

Shkak për tërheqjen e tyre është bërë fakti se ata kanë marrë pjesë në vendimin për sekuestron e pasurive të Llallës.

Aktualisht ish-kryeprokurori ka ankimuar vendimin e shkallës së parë të Gjykatës kundër Korrupsionit dhe Krimit të Organizuar për dënimin e tij me 2 vite burg për fshehje të pasurisë. Ai është dënuar gjithashtu me 5 vite përjashtim ndaj çdo funksioni publik.

Vendimi u dha më 20 maj. Ai u gjet fajtor, sipas Gjykatës, për “Fshehje dhe mosdeklarim të pasurisë”.

Paralelisht, Gjykata vendosi dhe sekuestrimin e disa pronave të zotit Llalla që deri më tani ishin nën sekuestro.