Prishtinë – Lëvizja Vetëvendosje (LVV) ka propozuar kryetarin e saj, Albin Kurtin, njëherësh kryeministër në detyrë, për një mandat të ri në krye të Qeverisë së Kosovës. Propozimi u miratua me votë unanime gjatë mbledhjes së 59-të të Këshillit të Përgjithshëm të LVV-së.

Lëvizja Vetëvendosje ka dalë fituese në zgjedhjet parlamentare të 9 shkurtit, duke siguruar 48 ulëse në Kuvendin e Kosovës, një numër të pamjaftueshëm për të formuar qeverinë e re pa partnerë të tjerë politikë.

Vendimi për të propozuar Kurtin vjen vetëm pak ditë pas vendimit të Gjykatës Kushtetuese të Kosovës, e cila ka miratuar një masë të përkohshme që ndalon deputetët të ndërmarrin veprime për formimin e Qeverisë së re nga 5 deri më 30 shtator. Lëvizja Vetëvendosje e ka kritikuar këtë masë dhe ka bërë thirrje për ecje përpara me formimin e ekzekutivit të ri.

Në fjalimin e tij gjatë mbledhjes, nënkryetari i LVV-së, Glauk Konjufca, kritikoi partitë e tjera të mëdha shqiptare, duke i fajësuar për krizën institucionale:

“Sivjet e pamë përpjekjen më të rrezikshme për mosnjohjen e rezultatit zgjedhor, me apo ndoshta pa vetëdije. Partitë politike që e kanë shpallur veten kundërshtare të Lëvizjes Vetëvendosje qysh prej certifikimit të zgjedhjeve, janë përpjekur ta thonë vetëm një gjë: vetëm një votë më pak se 50 për qind dhe shteti mbetet pa Kuvend.”

Ky vendim i LVV-së për të propozuar Kurtin synon të krijojë një bazë të fortë politike për formimin e qeverisë, pavarësisht sfidave institucionale dhe bllokadave që kanë penguar deri më tani funksionimin e plotë të institucioneve të Kosovës.