Sekretari Amerikan i Shtetit, Marco Rubio, mbërriti sot në Izrael, ku përcolli mesazhin e mbështetjes së palëkundur të administratës së Donald Trump për aleatin strategjik të SHBA-së në Lindjen e Mesme, pavarësisht reagimeve ndërkombëtare ndaj sulmeve të fundit izraelite në Katar.

Sipas Departamentit të Shtetit, vizita e Rubio-s ka për qëllim “të riafirmojë angazhimin e Uashingtonit për sigurinë e Izraelit” në një moment kur në arenën ndërkombëtare po rritet mbështetja për njohjen e shtetit palestinez.

Vetëm dy ditë më parë, Asambleja e Përgjithshme e Kombeve të Bashkuara miratoi me shumicë dërrmuese “Deklaratën e Nju Jorkut”, një dokument i hartuar nga Franca dhe Arabia Saudite që synon rigjallërimin e zgjidhjes me dy shtete për Izraelin dhe Palestinën. Për herë të parë, teksti përjashton në mënyrë të qartë lëvizjen Hamas nga çdo proces negociator.

Rezoluta u miratua me 142 vota pro, 10 kundër – mes tyre SHBA dhe Izraeli – dhe 12 abstenime. Ndërsa shumë vende e panë si një hap të rëndësishëm drejt paqes, qeveria izraelite e ka dënuar dokumentin, duke e cilësuar si “një tjetër provë të paaftësisë së OKB-së për të dënuar terrorizmin” që nga sulmet e 7 tetorit 2023.

Vizita e Rubio-s shihet si një përpjekje për të shmangur izolimin diplomatik të Izraelit dhe për të dhënë sinjal se Uashingtoni mbetet i vendosur në krah të Tel Avivit, edhe pse shumë aleatë tradicionalë të SHBA-së kanë mbështetur rezolutën.