Një emigrant afgan që mbërriti vitin e kaluar në Britani me gomone është shpallur fajtor nga gjykata në Londër për kërcënim me vrasje ndaj liderit të partisë Reforma, Nigel Farage, pas një videoje të publikuar në TikTok.

Fayaz Khan, i njohur në rrjet si Mada Pasa, u kap duke kërcënuar Farage duke thënë: “Mos u merr me mua, se do vij në Angli të martohem me motrën tënde dhe ti nuk më njeh mua.” Videoja u transmetua nga Franca, ku Khan ndodhej pasi kishte jetuar më parë gjashtë vjet në Suedi.

Juria e gjykatës me 12 anëtarë e shpalli fajtor me 10 vota pro dhe dy kundër, ndërsa ai pritet të dënohet të martën për kërcënim ndaj Farage dhe hyrje të paligjshme në Britani. Khan është gjithashtu nën hetim në Suedi për krim me thikë dhe pornografi me të mitur, ku do të përballet me drejtësinë në dhjetor.

Ngjarja risjell në fokus tensionet për Nigel Farage, i njohur për qëndrimet e tij kritike ndaj emigrantëve dhe sulmet e mëparshme ndaj tij gjatë fushatave elektorale, duke përfshirë edhe hedhjen e qumështit në fytyrë nga votues të pakënaqur.

Ky rast nënvizon rreziqet e kërcënimeve virtuale ndaj figurave publike dhe sfidat e sigurisë në një epokë ku rrjetet sociale mund të përdoren për intimidim dhe dhunë verbale.