Sa shpesh duhet t’i lajmë flokët? Çdo ditë, çdo dy ditë apo vetëm një herë në javë? Pyetja që duket e thjeshtë vazhdon të ndezë debate të pafundme, sidomos në epokën e rrjeteve sociale ku çdo opinion kthehet në një trend bukurie.

Sipas ekspertes së kujdesit të flokëve Naila Battel, nuk ekziston një përgjigje universale – gjithçka varet nga tipi i skalpit, struktura e flokëve dhe stili i jetesës.
“Nëse skalpi është i yndyrshëm, larja çdo dy ditë është e nevojshme.
Nëse është i thatë, dy herë në javë mjafton. Në kushte normale, çdo 2–3 ditë është frekuenca ideale,” shpjegon ajo.

Ekspertja shton se edhe faktorët e jashtëm luajnë rol të rëndësishëm: personat që stërviten shpesh apo jetojnë në qytete me ndotje të lartë kanë nevojë për larje më të shpeshtë.

Në kundërshtim me mitin e përhapur, Battel thekson se larja e shpeshtë nuk dëmton flokët – përkundrazi.
“Një skalp i pastër është gjithmonë më i shëndetshëm se ai që mban për ditë papastërti, yndyrë dhe ndotje. Sekreti qëndron te përdorimi i një shampoje të butë dhe të përshtatur për tipin e flokëve.”

Si të zgjidhni shampon e duhur:
• Për flokë me yndyrë: formula që rregullojnë prodhimin e sebumit.
• Për flokë të thatë apo të trajtuar: shampo hidratuese dhe ushqyese.

Ekspertja rekomandon produkte me pH natyral, pa sulfate e parabene, dhe këshillon që konsumatorët të lexojnë listën e përbërësve për të shmangur silikonët apo derivatet e naftës.

Roli i balsamit mbetet po aq i rëndësishëm:
“Balsami zbut, shpërbën nyjet dhe mbron fibrën e flokëve. Për kujdes më të thellë, alternoni me një maskë hidratuese,” – shton Battel.

Sa për shampon e thatë, ajo është “një ndihmë e përkohshme”, që mund të përdoret kur nuk ka kohë për larje, por nuk mund të zëvendësojë ujin dhe shampon tradicionale.

Në fund, ekspertët bien dakord për një gjë: flokët e pastër nuk janë çështje mode, por çështje shëndeti.