Presidenti ukrainas, Volodymyr Zelensky, ka njoftuar se ka zhvilluar për herë të dytë brenda dy ditësh një bisedë telefonike me presidentin amerikan Donald Trump, duke e cilësuar atë si “shumë produktive”.
Përmes një postimi në rrjetin X, Zelensky tha se diskutimi u përqendrua te forcimi i mbrojtjes së Ukrainës, veçanërisht në fushën e mbrojtjes ajrore dhe aftësive me rreze të gjatë veprimi.
“Sapo fola me Presidentin e SHBA-së Donald Trump, për herë të dytë brenda dy ditësh, dhe sot ishte përsëri një bisedë shumë produktive.
Dje, ramë dakord për një temë specifike për sot dhe shqyrtuam të gjitha aspektet e situatës,” shkroi Zelensky.
Ai shtoi se Trump është i informuar mirë për zhvillimet në terren dhe se të dy palët janë dakorduar të vazhdojnë dialogun për koordinimin e mëtejshëm mes ekipeve të tyre.
“Mbrojtja e jetës në vendin tonë, forcimi i saj në aspektin e mbrojtjes ajrore dhe të qëndrueshmërisë, ishin në qendër të bisedës. Ramë dakord të vazhdojmë komunikimin dhe ekipet po përgatiten. Faleminderit,” përfundoi Zelensky.
Ky është komunikimi i dytë i konfirmuar publikisht mes dy liderëve në më pak se 48 orë, në një moment të ndjeshëm për Ukrainën, që kërkon mbështetje të re ndërkombëtare përballë agresionit rus.
