Presidentja e Komisionit Evropian, Ursula von der Leyen, ndodhet sot në Tiranë në kuadër të një turi ballkanik që përfshin disa kryeqytete të rajonit.

Vizita e saj ka nisur me një takim me Presidentin Bajram Begaj në orën 09:15, në ambientet e Presidencës, ku u diskutua mbi marrëdhëniet mes Shqipërisë dhe Bashkimit Europian, si dhe mbi procesin e integrimit europian të vendit.

Më pas, von der Leyen u prit me ceremoni shtetërore nga Kryeministri Edi Rama në bulevardin “Dëshmorët e Kombit”, në orën 09:50, ku u zhvillua ceremonia zyrtare e mirëseardhjes me nderime dhe himnet kombëtare.

Në orën 10:00 është zhvilluar një takim kokë më kokë mes Kryeministrit Rama dhe Presidentes së KE-së, i cili do të pasohet nga një takim dypalësh mes delegacioneve respektive.

Vizita do të përmbyllet me një konferencë të përbashkët për shtyp në orën 11:15, që do të mbahet në ambientet e Kryeministrisë.

Ky qëndrim i von der Leyen në Tiranë vjen në një moment kyç për procesin e integrimit evropian të Shqipërisë, në prag të hapjes së kapitujve të parë të negociatave dhe në kuadër të përpjekjeve të BE-së për të forcuar bashkëpunimin me Ballkanin Perëndimor.