Kreu i Aleancës për Ardhmërinë e Kosovës, Ramush Haradinaj, deklaroi se partia e tij ka dalë fituese në shumicën e komunave që ka drejtuar deri më tani, përfshirë Suharekën, Rahovecin, Deçanin, Gjakovën dhe Klinën.

Në një konferencë për media, Haradinaj u bëri thirrje komisionerëve zgjedhorë që të ruajnë integritetin e procesit të numërimit të votave dhe të mos lejojnë asnjë keqpërdorim.

“Ekziston mundësia që gara në Junik të vazhdojë në rundin e dytë. Ne kemi garuar në 25 komuna për kryetarë dhe në 28 për asamble komunale. Kemi informata për rritje të votës për Aleancën edhe për asamble, por do të presim rezultatet përfundimtare”, tha Haradinaj.

Sipas tij, rezultatet e deritanishme janë dëshmi e besimit të qytetarëve në qeverisjen lokale të AAK-së dhe e një rritjeje të ndjeshme të mbështetjes në mbarë vendin.