Ndërsa Presidenti amerikan Donald Trump dhe udhëheqësit e Lindjes së Mesme nënshkruan të hënën një marrëveshje historike armëpushimi për Gazën, një pyetje mbeti pezull: çfarë përmbante saktësisht dokumenti që u cilësua si “marrëveshja e shekullit”?
Një fotografi nga ceremonia e nënshkrimit zbulon pjesërisht përmbajtjen e dokumentit, ku Trump ngriti faqen e fundit përpara kamerave. Në gjysmën e sipërme të faqes, renditen angazhimet kryesore të palëve, të cilat theksojnë parimet e tolerancës, dinjitetit dhe mundësive të barabarta për çdo person.
Në një nga paragrafët kryesorë thuhet:
“Ne kërkojmë tolerancë, dinjitet dhe mundësi të barabarta për çdo person, duke siguruar që ky rajon të jetë një vend ku të gjithë mund të ndjekin aspiratat e tyre në paqe, siguri dhe prosperitet ekonomik, pavarësisht nga raca, besimi apo etnia.”
Në fund të dokumentit ndodhen nënshkrimet dhe titujt e udhëheqësve pjesëmarrës, përfshirë presidentin Trump, si dhe liderët e Egjiptit, Katarit dhe Turqisë, të cilët shërbyen si ndërmjetës në arritjen e armëpushimit.
Marrëveshja, e cilësuar nga analistët si një moment kthese në historinë e konfliktit izraelito-palestinez, synon të ndalojë përplasjet dhe të hapë rrugën për negociata të qëndrueshme paqeje në rajonin më të trazuar të botës.
