Kryedemokrati Sali Berisha ka festuar 81-vjetorin e lindjes në selinë blu, në një takim me deputetët e Grupit Parlamentar të PD-së. Në një atmosferë miqësore, Berisha u shpreh mirënjohës për mbështetjen ndër vite, ndërsa foli për “sekretin” e energjisë dhe fizikut të tij në këtë moshë.

“Sot e kam nisur ditën me një mesazh mirënjohjeje të pakufishme ndaj Zotit, familjes, miqve dhe mbështetësve në këto 35 vite,” – tha ai, duke shtuar me humor se “vjeshta” e jetës së tij mund të quhej fare mirë edhe “pranverë”.

“Nuk kam një sekret, është një dhe vetëm një – puna, puna dhe vetëm puna,” u shpreh Berisha, ndërsa të pranishmit e shoqëruan me duartrokitje.

Festimi i 81-vjetorit vjen në një periudhë të ngarkuar politike për ish-kryeministrin, i cili vijon të udhëheqë opozitën në përballjen me mazhorancën socialiste.