Një ngjarje e rëndë ka tronditur Durrësin në orët e para të mëngjesit të sotëm, ku dy persona humbën jetën pas një konflikti që nisi për motive të dobëta në Manëz, pranë një karburanti.

Sipas burimeve, ngjarja ka ndodhur rreth orës 01:45 të datës 22 tetor 2025, pasi një debat i nisur në ambientet e një lokali është përshkallëzuar në përplasje me armë zjarri.
Mësohet se njëri prej viktimave, së bashku me një tjetër person, kishte hyrë në lokal dhe i kishte kërkuar kamerierit që t’u përgatiste kafe, por ky i fundit u kishte thënë se ekspresi ishte i fikur.
Në atë moment, një tjetër klient që ndodhej në lokal ndërhyri në debat, çka dyshohet të ketë qenë shkaku që përplasja degradoi në konfliktin fatal.

Burime pranë hetimeve bëjnë me dije se në përleshje nuk ka qenë i përfshirë kamerieri, ndërsa asnjë prej personave të tjerë në lokal nuk është plagosur.

Sipas njoftimit zyrtar të Policisë së Shtetit, në përfundim të konfliktit mbetën të vrarë:

Aranit Kurti, 23 vjeç
Flori Paluçi, 33 vjeç

Të dy banues në Manëz, Durrës.

Hetimet paraprake kanë zbuluar se Flori Paluçi është qëlluar për vdekje nga Daniel Pepa, 21 vjeç, ndërsa Aranit Kurti dyshohet të jetë vrarë nga vetë Flori Paluçi gjatë shkëmbimit të zjarrit.

Forcat e policisë po vijojnë kontrollet intensive për kapjen e Daniel Pepa, i cili ndodhet ende në arrati.
Ndërkohë, një grup i posaçëm hetimor nën drejtimin e Prokurorisë së Durrësit po punon për zbardhjen e plotë të rrethanave të ngjarjes dhe identifikimin e personave të tjerë që mund të kenë qenë të përfshirë.

Autoritetet po mbledhin dëshmi dhe prova materiale për të dokumentuar ligjërisht këtë ngjarje që ka tronditur qytetin bregdetar.