Gazetari Artan Hoxha ka komentuar zhdukjen misterioze të Ervis Martinajt, një nga emrat më të përfolur në botën e krimit në Shqipëri.

Sipas Hoxhës, Martinaj është vrarë dhe kufoma e tij është zhdukur, ndërsa një aleancë e grupeve kriminale u formua pikërisht për ta eliminuar atë.

“Problemi ka nisur 3 vite e gjysmë më parë, kontakti i fundit ishte më 9 gusht, dhe më pas u ndërpre çdo komunikim. Versioni është që e kanë rrëmbyer, vrarë dhe zhdukur kufomën,” tha Hoxha.

Ai shtoi se Martinaj ishte një figurë që modernizoi krimin, ishte babai i katër fëmijëve dhe kishte studuar për ekonomi biznesi, duke mos ardhur nga bota e krimit.

Gazetari përmend edhe një ngjarje ku Martinaj kishte blerë një vilë shumë afër shtëpisë së kryeministrit Rama, duke u bërë sipas tij një figurë që u bë armik publik.

“Në Shqipëri mund t’i fshihesh kujtdo, por jo aleancës që u bashkua për ta goditur atë. Jam i bindur që e kanë eliminuar,” përfundoi Hoxha.

Kjo deklaratë rikthen në vëmendje misterin mbi fatin e Martinajt dhe aleancat e ndryshme brenda botës së krimit.