Emin Pacolli, vëllai i biznesmenit kosovar Behgjet Pacolli, është marrë në pyetje nga Prokuroria e Tiranës lidhur me veprimet në kompaninë konçesionare për ndërtimin e Aeroportit të Vlorës. Hetimi, i regjistruar për “Mashtrim me pasoja të rënda”, vijon ndërsa prokuroria pritet të thërasë edhe Behgjet Pacollin për shpjegime.

Sipas dëshmisë së dhënë, Emin Pacolli ka pranuar një konflikt tregtar me biznesmenin Valdon Ademi për shitjen e 49% të aksioneve, por ka mohuar përfshirjen e vëllait të tij në këtë çështje. Ai sqaroi se Behgjet Pacolli nuk ka dijeni dhe nuk ka të drejtë firme në kompaninë “Mabco Constructions SA”, e cila aktualisht zotëron 98% të aksioneve të “Vlora International Airport – VIA”.

Hetimi vijon ndërkohë që autoritetet shqyrtojnë të gjitha veprimet financiare dhe kontraktuale të lidhura me projektin e konçesionit.