Merr fund arratia e Erind Laskut, pjesë e grupit kriminal të trafikut të drogës të drejtuar nga Elvis Doçi, i goditur në prill gjatë operacionit “Ura”. Lasku është ekstraduar këtë të enjte nga Milano në Shqipëri, pas një bashkëpunimi të ngushtë mes Interpol Tiranës dhe Interpol Romës, në kuadër të operacionit ndërkombëtar “The Wanted”.

Sipas njoftimit zyrtar të Interpol Tiranës, Lasku akuzohet se ka bashkëpunuar me kompani transporti për të sjellë rreth 3 milionë euro nga Italia në Shqipëri, me qëllim pastrimin e parave të përfituara nga trafiku i lëndëve narkotike.

“Vijon bashkëpunimi i ngushtë me partnerët në kuadër të operacionit ndërkombëtar ‘The Wanted’. Si rezultat, u finalizua procedura e ekstradimit nga Italia në Shqipëri e shtetasit Erind Lasku, që koordinoi pastrimin e parave të një grupi kriminal në Durrës”, njofton Interpol Tirana.

Lasku kërkohej ndërkombëtarisht pasi GJKKO, në prill 2025, i caktoi masën e sigurisë ‘Arrest në burg’ për veprën penale të “Pastrimit të produkteve të veprës penale apo veprimtarisë kriminale”, të kryer në kuadër të një grupi të strukturuar kriminal.