Ish-deputeti i Partisë Socialiste, Petro Koçi, kujtoi me respekt figurën e ish-kryeministrit Fatos Nano gjatë homazheve në nderim të tij, duke theksuar kontributin historik që ai dha në transformimin e Partisë së Punës dhe në rindërtimin e shtetit shqiptar pas krizës së vitit 1997.

Në një prononcim për mediat, Koçi e përshkroi Nanon si një lider me kurajë shtetërore dhe diplomaci të guximshme, që shënoi një epokë të rëndësishme në politikën dhe diplomacinë shqiptare.

“Ngriti nga gërmadhat Partinë e Punës në një parti demokratike evropiane dhe pastaj mori përsipër misionin për të ngritur Shqipërinë nga gërmadhat e 1997-s në një shtet normal,” – deklaroi Koçi.
“Ishte një politikan me qytetari dhe intelekt të pakonkurrueshëm, që përballoi me shpirt fisnik burgosjen e padrejtë nga Sali Berisha. Fatos Nano ishte patriot i madh — jo vetëm që ringriti shtetin e rrënuar, por dha frymë dhe mbështetje çlirimtare për UÇK-në,” shtoi ai.

Koçi u ndal edhe te takimi i diskutueshëm i Nanos me Sllobodan Millosheviçin, duke e cilësuar atë si “një paradhomë të Rambujesë” dhe shembull të diplomacisë me vizion.

“Ishte një akt kurajoz dhe pjesë e një vale të përbashkët me partnerët tanë gjeostrategjikë,” – tha Koçi, duke e cilësuar Fatos Nanon si një figurë që la gjurmë të pashlyeshme në historinë moderne të Shqipërisë.