Kreu i Partisë Demokratike, Sali Berisha, ka reaguar pas atentatit mafioz të ndodhur pranë aeroportit të Rinasit, ku u ekzekutua Gilmando Dani, krahu i djathtë i Emiljano Shullazit, ndërsa mbeti i plagosur Muçi Shaljani (Sheqeri), agjent i AMP-së.

Në një postim në Facebook, Berisha ka shpërndarë pamjet e ngjarjes, duke ironizuar Policinë e Shtetit me fjalët:

“Vrasësit i panë të gjithë, përveç narko-policisë që kishte mbyll sytë me maska.”

Si ndodhi atentati
Ngjarja ndodhi mesditën e djeshme, pranë aeroportit të Rinasit, ku autorët hapën zjarr ndaj një automjeti Benz i bardhë luksoz. Brenda tij ndodheshin Gilmando Dani dhe Muçi Shaljani, të cilët po lëviznin në drejtim të Tiranës.

Autorët i zunë pritë dhe qëlluan me breshëri plumbash, duke lënë të vdekur në vend Danin, ndërsa Shaljani mbeti i plagosur rëndë. Mjeti, i cili ishte në pronësi të Elvis Kosovës, drejtohej nga Shaljani, ndërsa Dani ndodhej në sediljen e pasagjerit.

Sipas hetimeve paraprake, Dani kishte mbërritur në Shqipëri nga Barcelona dhe vetëm pak minuta pas daljes nga aeroporti ra pre e atentatit.

Policia po vijon hetimet për identifikimin e autorëve dhe zbardhjen e motivit të ngjarjes që tronditi kryeqytetin.