Një 35-vjeçar është arrestuar nga Policia e Tiranës, pasi tentoi të largohej me shpejtësi me një automjet të vjedhur, duke shkaktuar një zinxhir përplasjesh në kryeqytet.

Sipas njoftimit zyrtar, shtetasi D. M., dyshohet se në orët e para të mëngjesit të 30 tetorit 2025, ka vjedhur një automjet në rrugën “Bardhyl”. Menjëherë pas vjedhjes, ai është larguar me shpejtësi, por gjatë arratisjes ka përplasur dy mjete të parkuara në rrugën “Mihal Duri”.

Pas aksidentit, 35-vjeçari e braktisi automjetin e vjedhur në vendngjarje, duke tentuar të largohej në këmbë, por u kap nga shërbimet policore.

Policia po vijon hetimet për zbardhjen e plotë të aktivitetit të tij dhe identifikimin e mundshëm të personave të tjerë të përfshirë.