Ish-drejtori i përgjithshëm i Burgjeve, Agim Ismaili, është vënë zyrtarisht nën hetim nga Prokuroria e Posaçme, në lidhje me tentativën për të hakeruar sistemet e SPAK. Lajmi u konfirmua nga gazetarja Klodiana Lala, pasi Ismaili u paraqit për herë të dytë në ambientet e SPAK, paraditen e së martës.

Ismaili mbërriti i vetëm rreth orës 10:00 dhe qëndroi në prokurori për afërsisht 90 minuta, ndërsa në dalje refuzoi të komentonte para mediave.

Kjo është thirrja e dytë që ish-zyrtari i lartë i burgjeve merr nga SPAK, pas marrjes në pyetje më 2 tetor, gjithashtu në kuadër të hetimit për tentativën e ndërhyrjes në sistemet elektronike të institucionit.

SPAK ishte vënë në shënjestër të një ndërhyrjeje të paligjshme

Sipas burimeve, më 12 mars 2025, SPAK ka marrë sinjalizime për një tentativë të paligjshme për të depërtuar në adresat e email-eve të prokurorëve të posaçëm. Ndërhyrja dyshohet se ka qenë e organizuar dhe e mirëstrukturuar, por ka dështuar falë protokolleve të sigurisë së sistemit.

SPAK njoftoi se sistemi i brendshëm informatik mbeti i pacënuar, ndërsa hetimet vijojnë për identifikimin dhe përgjegjësinë penale të të gjithë personave të përfshirë.