Policia e Tiranës ka vënë në pranga dy kushërinj, të dyshuar për transportimin dhe shpërndarjen e lëndëve narkotike në kryeqytet. Në kuadër të operacionit antidrogë të koduar “Hallka e parë”, u arrestuan Armand Nela, 34 vjeç, dhe Saimir Nela, 31 vjeç, ndërsa u sekuestruan 2 kilogramë e 235 gramë kokainë.

Operacioni u zhvillua pas informacioneve operative të marra nga Komisariati Nr. 4, sipas të cilave dy të rinjtë po lëviznin me automjet me qëllim transportimin e kokaine për shitje. Pasi policia identifikoi mjetin dhe e ndoqi deri në zonën e njohur si “Treshi”, automjeti u ndalua dhe iu nënshtrua kontrollit.

Gjatë kontrollit, efektivët gjetën dhe sekuestruan:
• 2 pako me 2 kg e 235 g kokainë
• një pistoletë të dyshuar lodër

Dy të arrestuarit akuzohen për veprën penale “Prodhimi dhe shitja e narkotikëve”. Hetimet e para tregojnë se kushërinjtë dyshohet të jenë furnizues të një rrjeti shpërndarësish në zonat “Alliasi” dhe “Oxhaku”, ku lënda ndahej në doza për t’u shitur tek përdoruesit.

Policia vijon hetimet për identifikimin e bashkëpunëtorëve të tjerë dhe të burimit të furnizimit të sasisë së sekuestruar.