Dy kushërinj, Saimir dhe Armand Nela, janë arrestuar nga Policia e Tiranës për trafik të lëndëve narkotike. Burime zyrtare bëjnë me dije se të dy të rinjtë furnizonin me kokainë individë dhe grupe që më pas e ndanin lëndën në doza për shitje në zonat e njohura si “Alliasi” dhe “Oxhaku” në kryeqytet.

Operacioni i Policisë u finalizua pas një monitorimi të kujdesshëm të lëvizjeve të dy të rinjve, të cilët u arrestuan për veprën penale “Prodhimi dhe shitja e narkotikëve”. Hetimet për të zbuluar rrjetin e shpërndarjes dhe bashkëpunëtorët e mundshëm vijojnë nga autoritetet e rendit.

Ky rast vjen si pjesë e një serie operacionesh të Policisë së Tiranës për goditjen e paligjshmërisë në fushën e narkotikëve dhe për të parandaluar përhapjen e drogës në kryeqytet.