Romë – Një ngjarje e rëndë ka tronditur natën e kaluar lagjen Monteverde të Romës, ku 27-vjeçari Leonardo Fiorini ndërroi jetë pasi ra nga kati i tretë i një apartamenti. Hetimet paraprake zbulojnë se Fiorini dyshohet të jetë shtyrë nga shoku i dhomës, 25-vjeçari italo-shqiptar David Stojanovic, i cili është arrestuar për vrasje.

Të dy të rinjtë, me origjinë nga Isola del Liri, qëndronin prej disa ditësh në një dhomë të marrë me qira në strukturën turistike. Sipas dëshmive të fqinjëve, mes tyre shpërtheu një debat i ashpër që më pas u zhvendos në ballkon. Gjatë përplasjes fizike, Stojanovic dyshohet të ketë shtyrë Fiorinin, i cili ra nga një lartësi rreth 12 metrash dhe vdiq menjëherë.

Kur mbërritën karabinierët, Stojanovic u gjet ende në apartament në gjendje të rënduar psikofizike, dyshohet pas përdorimit të substancave. Në dhomë u gjet edhe një sasi hashashi. Të dy të rinjtë janë të fejuar, por partneret e tyre nuk ndodheshin në vendngjarje.

Pavarësisht ndërhyrjes së menjëhershme të mjekëve të 118, Fiorinit nuk iu dha mundësi shpëtimi. Stojanovic u shoqërua në komisariat dhe, pas marrjes në pyetje, prokurori urdhëroi arrestimin e tij për vrasje. Aktualisht, ai ndodhet në arrest shtëpie, ndërsa pritet seanca e konfirmimit të masës para gjyqtarit.

Hetimet e karabinierëve vazhdojnë për të sqaruar motivet e konfliktit dhe dinamikën e rënies fatale.