Kryeministri Edi Rama e cilësoi sot procesin e zgjerimit të Bashkimit Europian si një mundësi për ribashkimin e kontinentit dhe forcimin e së ardhmes së tij, gjatë fjalës së tij në një forum të zhvilluar në Bruksel.

“Faleminderit që më vendosët sërish në këtë fushëbetejë idesh për të ardhmen e Europës. Në këtë të ardhme që ne kemi me të gjitha nuancat e grisë edhe në ditën e premtimit… As që do të heq dorë nga zgjerimi. Sepse është një lidhje e pandashme mes zgjerimit dhe Europës,” tha Rama.

Kryeministri theksoi se ky “ribashkim” është i domosdoshëm për një kontinent që përballet me sfida të mëdha dhe duhet të gjejë veten mes historisë, rivaliteteve dhe pajtimit. Ai e përshkroi zgjerimin si një element kyç për stabilitetin dhe unitetin e Europës, duke e lidhur ngushtë me të ardhmen e saj.