Përplasja mes Fedez dhe Luis Sal ka shpërthyer në një “luftë të ftohtë” të hapur në rrjetet sociale, pas ditësh thumbimesh dhe akuza të ndërsjella mes podkasteve të tyre, “Muschio Selvaggio” dhe “Pulp Podcast”.

Në qendër të konfliktit ka hyrë edhe menaxheri i Luisit, Riccardo Vignola, i cili ka hedhur akuza të forta në adresë të reperit italian. Sherri nisi nga pretendimet se Fedez është paditur nga Luis për interesa financiare, një insinuatë që Vignola e ka mohuar ashpër në Instagram.

Në një seri InstaStory, ai nuk kurseu fjalët:

“Na shkakton neveri. Fansat e tu nuk të duan ty, ata duan thashethemet,” shkruan Vignola, duke e akuzuar Fedezin se jeton nga drama dhe jo nga muzika.

Ai e përshkruan reperin si të papjekur dhe të izoluar, “të braktisur nga të gjithë”, duke shtuar se nëse kjo situatë do të ishte një këngë, “do të ishte një diss i plotë”. Sipas tij, pala e Luisit ka qëndruar e heshtur deri tani:

“Sepse na neverit, njësoj si të gjithë ata që të takojnë rastësisht, dhe sepse kemi jetën tonë dhe nuk kemi kohë të dëgjojmë të qarat dhe shakatë e tua 16-vjeçare.”

Menaxheri akuzon Fedezin se ka përdorur famën për t’i dëmtuar:

“S’na ke lënë gjë pa bërë: na çove në gjykatë, na denigrove, na acarove duke shfrytëzuar pushtetin tënd… Na kërkove para, përqindje, fitime nga sponsorët dhe u përpoqe në çdo mënyrë të na zije në kurth.”

Vignola shkon edhe më tej duke komentuar karrierën muzikore të reperit:

“Nuk di më kë të ofendosh në këngët e tua, as qeni yt s’të dëgjon më. Publiku yt s’të pëlqen ty, por thashethemet rreth teje. Ata duan të komentojnë marrëzitë që thua dhe ti detyrohesh t’i nxisësh vazhdimisht për të mbajtur vëmendjen gjallë.”

Konflikti publik ka ndarë fansat në kampe, duke kthyer përplasjen mes ish-bashkëpunëtorëve në një telenovelë të re të showbiz-it italian.