Deputetët e Partisë Demokratike zhvilluan sot një takim me Mark Fleming, Drejtorin për Çështjet e Europës Perëndimore dhe Qendrore në Departamentin Amerikan të Shtetit.

Kryetari i Grupit Parlamentar të PD-së, Gazment Bardhi, bëri të ditur diskutimet dhe theksoi rëndësinë e partneritetit strategjik me Shtetet e Bashkuara. Ai vuri theksin mbi luftën kundër krimit të organizuar si një domosdoshmëri për Shqipërinë:

“Shqipëria ka nevojë për luftë reale ndaj krimit të organizuar, dhe për këtë nevojitet një qeverisje e përgjegjshme, e pa lidhur me krimin e organizuar, si dhe një drejtësi e pavarur dhe me integritet.”

Bardhi shtoi se kjo luftë është një detyrim për çdo vend anëtar të NATO-s dhe rikonfirmoi mbështetjen e SHBA-së për institucionet shqiptare dhe procesin e integrimit europian:

“SHBA ka qenë dhe mbetet një partner kyç në mbështetjen e Shqipërisë dhe të ardhmes së saj europiane.”