Seanca parlamentare e së mërkurës u ndez nga akuzat e forta të deputetit të opozitës, Gazment Bardhi, i cili goditi mazhorancën për mënyrën se si është përgatitur dhe paraqitur projektbuxheti 2024 dhe paketa fiskale shoqëruese.

Nga foltorja e Kuvendit, Bardhi deklaroi se qeveria po shmang me qëllim debatin parlamentar për buxhetin, duke lënë vetëm 24 orë kohë për shqyrtimin e dokumenteve, ndërsa akuzoi direkt se projektligjet shërbejnë për të “falur 2 miliardë euro detyrime bizneseve pranë kryeministrit”.

“Një mashtrim publik – pensionistëve u jepni 100 mijë lekëshin e vjetër të fundvitit”

Bardhi theksoi se qeveria po përdor propagandë kur flet për rritje pensionesh dhe pagash, teksa realisht, sipas tij, po favorizon një grup të vogël biznesesh të fuqishme.

“Ndërsa 50 miliarderëve ua falni 2 miliardë euro detyrime, pensionistëve po bëni sikur po u rrisni pensionet, duke u dhënë 100 mijë lekëshin që është dhënë gjithmonë në fundvit,” u shpreh ai.

Deputeti demokrat akuzoi mazhorancën se po refuzon çdo diskutim të mirëfilltë për buxhetin, me qëllim që publiku të mos e kuptojë “thelbin e vërtetë” të paketës fiskale.

Akuza për shkelje kushtetuese: “Ligjet erdhën me vonesë, u miratuan brenda dy orësh”

Sipas Bardhit, qeveria ka shkelur rregulloren e Kuvendit dhe vetë Kushtetutën, duke sjellë projektbuxhetin pa ligjet financiare shoqëruese dhe duke i dorëzuar ato dy javë me vonesë.

Ai denoncoi procesin e përshpejtuar të miratimit:

“Tetë projektligje të paketës fiskale i shqyrtuat dhe i miratuat për dy orë, pa dëgjuar asnjë institucion, pa asnjë seancë dëgjimore. Dhe menjëherë i futët në seancë,” deklaroi Bardhi.

Goditje direkte ndaj mazhorancës: “Duartrokisni pandehurën e SPAK”

Në nisje të fjalës së tij, Bardhi shkaktoi tensione në sallë duke ironizuar mazhorancën dhe duke i ftuar deputetët socialistë të “duartrokasin pandehurën e SPAK-ut për 50 milionë euro abuzim”, duke iu referuar një ministreje në hetim.

“Është status ligjor. Unë nuk preva njeri,” tha ai, ndërsa mazhoranca reagoi me ndërhyrje.