Seanca plenare në Kuvend është tensionuar që në hapje të saj, teksa deputetët e Partisë Demokratike zgjodhën një formë të re proteste ndaj kryeministrit Edi Rama. Në momentin kur kreu i qeverisë mori fjalën për të prezantuar projektbuxhetin, demokratët u ngritën dhe i kthyen kurrizin foltores, duke refuzuar ta dëgjojnë.

Reagimi i Ramës ishte i menjëhershëm dhe i ashpër. Ai e quajti veprimin e opozitës një “lehtësim”, duke nënvizuar se preferonte “kurrizin e tyre sesa fytyrat”.
“Edhe të ankohen për ligjin, edhe të më ktheni kurrizin, nuk shkon. Por faleminderit, më lehtësoni fjalimin,” tha ai në nisje të prezantimit të buxhetit.

Kryeministri nuk nguroi të rikthehej edhe te protesta e opozitës e zhvilluar dy netë më parë para Kryeministrisë, ku kërkohej dorëheqja e tij dhe e zv.kryeministres Belinda Balluku. Me një gjuhë të ashpër dhe të pazakontë për foltoren e Kuvendit, Rama deklaroi se demokratët kishin mbetur “kashtë e koqe”, duke i akuzuar se përpiqen të bëjnë “prokurorin në rrugë”, ndërkohë që drejtësia po funksionon e pavarur.

Replikat e kryeministrit shkaktuan pakënaqësi të dukshme në radhët e opozitës, e cila vazhdoi protestën simbolike duke mos marrë pjesë në debat. Për disa minuta, salla e parlamentit u nda mes tensionit, fishkëllimave dhe komentimeve të ndërprera nga deputetët e PD-së.

Diskutimet për projektbuxhetin pritet të shoqërohen edhe në vijim me përplasje të forta, ndërsa opozita ka paralajmëruar veprime të tjera kundër qeverisë në ditët në vijim.