Ish-kryeministri Sali Berisha ka komentuar vendimin e Gjykatës së Posaçme për pezullimin nga detyra të zv/kryeministres dhe ministres së Infrastrukturës dhe Energjisë, Belinda Balluku.

Në një postim në rrjetet sociale, Berisha e përshkruan pezullimin si “një kronikë të paralajmëruar” dhe kritikon ashpër kryeministrin Edi Rama. Ai shprehet se lajmin për pezullimin e Ballukut e kishte marrë më parë nga burime të besueshme dhe se deklarata e Ramës për Ballukun, duke i thënë “duaje fatin tënd”, e kishte bindur se qeveria donte të largohej sa më shpejt nga Balluku.

Berisha thekson se Rama zgjodhi formën më poshtëruese për të “larë hesapet” me bashkëpunëtoren e tij të afërt, duke e trajtuar si një magaziniere të Këshillit të Ministrave, në vend se t’i kërkonte dorëheqjen siç i takonte. Ai argumenton se përgjegjësia për dy projektet më të mëdha, tunelin e Llogarasë dhe aeroportin e Vlorës, i takon Ramës dhe jo Ballukut, duke theksuar se ky akt nuk e shpëton kryeministrin nga përgjegjësia politike dhe morale.

Berisha përfundon postimin duke nënvizuar: “A shpëtoi Rama me këtë akt makbethian ndaj bashkëpunëtores së tij më të afërt? Jo dhe jo!”