Dritan Agolli, kreu i Fondit Shqiptar të Zhvillimit (FSHZH), po shihet si një figurë gjithnjë e më e fuqishme, ndërsa projektet e tij, financuar nga fonde shtetërore dhe kredi të huaja, po marrin dimension luksi dhe përfitime për familjen dhe bashkëpunëtorët e tij. Një pjesë e madhe e objekteve të ndërtuara nga FSHZH përmbajnë bare, restorante dhe hotele, duke u dukur më shumë si resorte sesa si ambiente shërbimi për komunitetin.

Kur FSHZH u krijua gjatë qeverisë “Berisha” dhe u pasua nga “Rama 1”, misioni ishte zhvillimi i rajoneve të vogla dhe qytezave, duke ndërtuar rrugë rurale, shkolla, kopshte, sheshe dhe fasada komunale. Por gjatë qeverive të mëvonshme, nën drejtimin e Dritan Agollit – ish-CEO në një kompani private ndërtimi – fokus i Fondit janë projektet luksoze, kryesisht në zonat turistike dhe atraksionet e vizituesve.

Projekti më i fundit është “Ferma e Mollëve” në zonat përreth Korçës, afër fshatit Qatrom, vetëm 5.4 km larg qytetit. Dokumentet e FSHZH tregojnë se ferma do të jetë një kompleks modern bujqësor, me bare, restorante dhe ambiente rekreative. Sipas dokumenteve, zona ka tokë pjellore dhe akses ndaj ujit, por kërkon infrastrukturë rrugore për t’u lidhur me rrugën interurbane.

FSHZH pretendon se projekti do të sjellë përfitime për fermerët, konsumatorët dhe turistët – duke ofruar edukim, produkte të freskëta dhe atraksione rekreative. Por një pyetje mbetet: Kush do të përfitojë realisht nga këto projekte luksi, dhe sa i shërben kjo komunitetit?