Gjatë 24 orëve të fundit, situata në vend pas përmbytjeve ka treguar një stabilizim të përgjithshëm, megjithëse në disa qarqe vijojnë problematikat e krijuara nga prurjet e larta të lumenjve, rrëshqitjet e dherave dhe dëmtimet në infrastrukturë. Nivelet e shumicës së lumenjve janë në rënie, ndërsa hidrovorët dhe forcat e emergjencës civile po punojnë me kapacitet të plotë.
Forcat e Emergjencave Civile, Forcat e Armatosura, strukturat vendore dhe ekipet e ndërhyrjes së shpejtë mbeten në terren për normalizimin e situatës dhe monitorimin e zonave me rrezik.
Situata në qarqe kryesore:
• Vlorë & Sarandë: Lumi Vjosë dhe Bistricë po shënojnë rënie. Forcat e FA dhe ekipet lokale punojnë për normalizimin e rrugëve dhe për ndihmën e banorëve të zonave me rrëshqitje dherash.
• Fier: Në fshatrat Çerven dhe Ferras, 25 banesa kanë pasur prezencë uji, ndërsa lumi Seman ka rënë me 70 cm.
• Korçë: Situata qetësohet në njësitë Bulgarec, Vithkuq, Drenovë, Mollaj. Po punohet për riparimin e argjinaturave të lumenjve Devoll dhe Dunavec. Rreth 50 raste dëmesh janë evidentuar në banesa dhe ura.
• Lezhë & Kurbin: Rreth 220 ha tokë nën ujë, ndërsa punimet për riparimin e digës së Lagunës Vain dhe shtratit të lumit Drojë vazhdojnë.
• Gjirokastër & Libohovë: Po punohet për stabilizimin e rrugëve të dëmtuara dhe urave, si dhe për largimin e ujit nga zonat e prekura.
• Tiranë & Kukës: Punime për largimin e ujit dhe riparimin e rrëshqitjeve të tokës në disa fshatra.
• Durrës, Shkodër & Elbasan: Nuk raportohen problematika të reja për shkak të motit të qëndrueshëm.
Ministria e Mbrojtjes dhe Agjencia Kombëtare e Mbrojtjes Civile po qëndrojnë në kontakt të vazhdueshëm me strukturat vendore dhe ekipet e emergjencës për të ardhur në ndihmë komuniteteve në zonat e prekura.
