Arrestimi i një 39-vjeçari në Athinë ka çuar në zbardhjen e një prej rrjeteve më të mëdha ndërkombëtare të trafikut të kokainës, që shtrihej nga Amerika Latine deri në Rusi dhe në disa vende të Europës. I kërkuar nga Belgjika me urdhër ndalimi europian, ai u kap nga policia greke pas hetimesh të thelluara dhe bashkëpunimit ndërkombëtar.

Sipas autoriteteve belge, grupi kriminal përdorte kontenierë detarë për të transportuar sasi të mëdha kokaine nga Ekuadori drejt porteve europiane, me fokus të veçantë portin e Anverpit. Hetimet kanë zbuluar një strukturë të gjerë bashkëpunëtorësh në Ekuador, Belgjikë, Spanjë, Greqi, Shqipëri dhe Rusi.

Grupi përdorte telefona të sigurt për komunikim dhe ndryshonte vazhdimisht rrugët e shpërndarjes për të shmangur gjurmimin. Në një nga bisedat e përgjuara, sipas dosjes belge, përmendet mbërritja e “3500 njësive”, e cila dyshohet të jetë 3.5 tonë kokainë.

Rasti lidhet me sekuestrimin e një kontenieri në portin e Anverpit në shtator 2024, ku u gjetën rreth 500 kg kokainë të fshehur mes ngarkesës së deklaruar. Arrestimi në Greqi konsiderohet një goditje e rëndësishme për rrjetin, i cili prej vitesh operonte me struktura të sofistikuara logjistike dhe mbështetje ndërkombëtare.

Belgjika tashmë ka kërkuar zyrtarisht ekstradimin e të arrestuarit, që pritet të përballet me akuza për trafik ndërkombëtar narkotikësh dhe pjesëmarrje në organizatë kriminale. Autoritetet e konsiderojnë kapjen e tij një hap të madh në shkatërrimin e këtij karteli ndërkontinental.